ഭൂമിയില്‍ അന്ധകാരവും അധര്‍മ്മവും വ്യാപിക്കുമ്പോള്‍ ജനങ്ങള്‍ക്ക് മാര്‍ഗ്ഗദര്‍ശനത്തിനു വേണ്ടി ഒരു പരിശുദ്ധാത്മാവിനെ എഴുന്നേല്പിക്കുകയും അദ്ദേഹം മുഖേന ജനങ്ങളെ സമുദ്ധരിക്കുകയും നവീന ദൃഷ്ടാന്തങ്ങള്‍ കാണിച്ചു കൊടുത്ത് നിര്‍മതത്വത്തിന്റെയും നിരീശ്വരത്വത്തിന്റെയും ഇരുട്ടില്‍ നിന്ന് അവരെ പുറത്തേക്കു കൊണ്ടുവരികയും ചെയ്യുകയെന്നത് ലോകാരംഭം മുതല്‍ക്കെയുള്ള അല്ലാഹുവിന്റെ ഒരു വഴക്കമാണെന്നു ലോകമതങ്ങളുടെ ചരിത്രത്തില്‍ കണ്ണോടിക്കുന്ന ആര്‍ക്കും തന്നെ മനസ്സിലാക്കാൻ കഴിയും.

അവസാന കാലത്ത് ഹദ്‌റത്ത് ഈസബ്‌നു മര്‍യം(അ) ആകാശത്ത് നിന്ന് ഉടലൊടെ ഇറങ്ങുകയും മുസ്‌ലിം ഉമ്മത്തിൽ ഇമാം മഹ്ദി(അ) ആഗതരാകുകയും പിന്നെ അവര്‍ രണ്ടുപേരും ഒന്നിച്ച് ഇസ്‌ലാം പ്രചരിപ്പിക്കുകയും ചെയ്യുമെന്ന് മുസ്‌ലിംകള്‍ പൊതുവില്‍ വിശ്വസിച്ചുപോരുന്നു. അതായത് സാധാരണ മുസ്‌ലിംകള്‍ അവസാന കാലത്ത് രണ്ട് ആത്മീയ വ്യക്തിത്വങ്ങളുടെ ആഗമനം പ്രതീക്ഷിച്ചിരിക്കുകയാണ്. എന്നാല്‍ “റസൂലന്‍ ഇലാ ബനീ ഇസ്‌റാഈല്‍” (സൂറ: ആലു ഇംറാന്‍) (അതായത് ബനീ ഇസ്‌റാഈലിലേക്ക് നിയോഗിക്കപ്പെട്ട റസൂല്‍) ആയ ഹദ്‌റത്ത് ഈസബ്‌നു മര്‍യം(അ) രണ്ടായിരം വര്‍ഷം മുമ്പേ മറ്റ് പ്രവാചകന്മാരെ പോലെ മരണപ്പെട്ടിരിക്കുന്നുവെന്നാണ് വിശുദ്ധ ഖുര്‍ആനില്‍ നിന്നും സ്വിഹാഹു സിത്തയിലെ ഹദീസുകളില്‍ നിന്നും വ്യക്തമാകുന്നത്. അദ്ദേഹം ഭൗതിക ശരീരവുമായി ആകാശത്തേക്കു  പോകുകയോ അവിടെ ജീവിച്ചിരിക്കുകയോ ഭൗതിക ശരീരവുമായി ഈ കാലഘട്ടത്തില്‍ ഈ ലോകത്തേക്ക് ഇറങ്ങിവരുകയോ ചെയ്യുന്നതല്ല. തിരുനബിയുടെ ഹദീസുകളില്‍ നിന്നും വ്യക്തമാകുന്നത് ദീനിന്റെ പുനരുജ്ജീവനത്തിനും ഉത്തിന്റെ പരിഷ്‌കരണത്തിനും വേണ്ടി മുഹദീ ഉമ്മത്തിൽ നിന്നുതന്നെ ഒരു വ്യക്തി ആഗതരാകുമെന്നാണ്. അദ്ദേഹം ഇസ്‌ലാമിക സാങ്കേതിക ശബ്ദത്തില്‍ അല്‍ ഇമാമുല്‍ മഹ്ദിയെന്ന് അറിയപ്പെടുന്നതാണ്. ആത്മീയമായി അദ്ദേഹം തന്നെയാണ് ഹദ്റത്ത് ഈസബ്‌നു മര്‍യമിന്റെ സദൃശ്യനും.